Síðasta vikan...

Nú eru síðustu myndirnar úr Íslandsferðinni komnar. Hvað er svo að frétta? Það er nóg að gera allavega, allir hamast við að setja í kassa og Dosti reynir að læra inn á milli. Honum gengur vel í lokaverkefninu og hefur fengið mjög jákvæð viðbrögð við því sem komið er. Dagur er í heimaskóla sem þýðir að hann lærir frá morgni til ca hálf fjögur, en þá fer hann út á völl. Við erum með skólabækurnar úr Austurbæjarskóla og reynum að halda í við samnemendur hans heima, þetta gengur bara nokkuð vel. Ég segi bara: eins gott að hann fékk tækifæri til að vera með "einkakennara" þennan mánuðinn því hann þarf ansi mikla hjálp í fögunum sem reynir á orðaforða og að skrifa texta á íslensku (sem er allt nema stæ og eðlisfr). Þetta bjargast allt! Dagur er akkúrat núna í heimsókn í bekknum sínum gamla og er að kveðja alla.

Gámurinn ógurlegi kemur á mánudagsmorgun og við ásamt Carli og Manosi höfum 3 klst til að fylla hann. Hlökkum til (eða ekki). Svo gistum við í íbúð Sophie í höllinni, en hún er skiptinemi í Kanada núna. Nú svo fljúgum við Jana, föstudaginn 21.sept til Íslands og strákarnir mánudaginn eftir. Styttist heldur betur...

Jana er í miklu drama eins og venjulega á leikskólanum, allt í góðu samt:)
Hún er að kveðja alla, fer yfirleitt heim með mismunandi vinkonu hvern dag eftir leikskóla, það verður mikil sorg að skilja við alla. Svo skipti hún aftur um kærasta, nú er það Noel vinur hennar en þau voru par fyrst. Hún sagði að Úlle hefði grátið í kaffitímanum yfir þessu svo ég held hún hafi tekið það að sér að finna nýja fyrir hann. Sooooldið stjórnsöm ha!?