Skammdegisljós

Ég sagði að menn ættu ekki að halda að ég væri orðinn óstöðvandi í að setja heimamyndböndin á vefinn, ég var auðvitað að grínast hahaha. Nú! Fyrst maður er kominn upp á lagið með tæknina er ekkert sem fær mann stöðvað nema hugmyndaflugið. Ég gróf rykið af rúmlega ársgömlu myndbandi sem ég á í prívatsafninu mínu. Og það er saga að segja frá því...

Eftir að við fluttum hingað til Svíþjóðar samdi ég ljóð (hálfgerðar vinjettur) til vina minna í Point þar sem ég vann eitt sinn. Ég skrifaði um hvað á daga mína hafði drifið fyrsta mánuðinn í fjarlægð. Ég var t.d. bitinn af hundinum, eplatréð brotnaði í garðinum og fleira. En ekkert atriði hafði það mikil áhrif á hug minn að fókusinn breyttist, hann var allan tímann í Hæðarsmáranum, í síma 544 5060.

Síðan fékk ég í lið með mér Lars (von der) Ullsson lífskúnstner og hann samdi lag við ljóðið. Per Karlson lék svo á gítar, Karin Solström á hristu, Bosse Larsson Hárfagri á banjó og meistari Ulf "be King" Jespersen ljáði rödd sína.

Útkoman var þetta fallega en hressa lag. Enginn annar en dogma gúrúinn Sven Odenberger skaut myndbandið. Það var ekki að sökum að spyrja en þetta varð eitt vinsælasta lag síðasta árs og er á fjölda árslista í Svíþjóð.

Hér fáið þið, vinir, að njóta enda ekki margir sem heimsækja þennan auma vef :) Lars og Per tóku það loforð af mér að þetta læki ekki út á netið. En...hvar byrjar og hvar endar svosem netið?

Menn verða að hafa heyrnatól þegar þeir hlusta (ekki heyrnahlífar þótt það kunni að vera fyrstu viðbrögð ;)

Gjörið svo vel! Thinking 'bout you!