Skíðatölt og Erik "the Eel" Íslendinga

Ég fékk senda grein úr Morgunblaðinu um Þórodd nokkurn sem fór í Vasa skíðagönguna í fyrra en hætti eftir 45 km vegna lélegs ásigkomulags.

Hann er samt enginn nýgræðingur því hann hefur gengið á 62 tinda af 151 í bókinni Íslensk fjöll, gengið á skíðum yfir Vatnajökul, gengið út um allan heim m.a. 16 daga í Nepal. Hann gekk 865 km á fyrstu 10 mánuðum síðasta árs. Nú ætlar hann að mætabetur undirbúinn til leiks og hefur hjólað, skokkað og æft á hjólaskíðum. Hann var í 25 manna æfingabúðum í nóvember á Ísafirði.


Munið eftir bobsleðaliðinu frá Jamaika eða sundmanninum Eric "The Eel" frá Afríku sem hafði aldrei synt í sundlaug?

Nú ég er sumsé að fara í þessa keppni og hef lagt að baki c.a. 2 km á gönguskíðum (í Janúar í fyrra). Og ekki lítur út fyrir að það fari að snjóa á næstunni. Ég er farinn að vona að það fari bara ekkert að snjóa...Þannig get ég komist út úr þessum ógöngum með sæmd...En maður ætti kannski að fara að kaupa sér bókina Íslenskir tindar eða eitthvað...eða lesa um rennsliseiginleika mismunandi skíðaáburða. Safna skeggi fyrir nefrennslisgrýlukertin (svona finsihline foto moment).
þetta er annars held ég eina íþróttagreinin í heiminum þar sem erfiðara er að fara niður brekku en upp. Einu minningar mínar um rennsli niður brekku á gönguskíðum eru þar sem ég hef krossað skíðin og flogið fram fyrir mig en staðnæmst með skíðastafina boraða inn í miltað.

Kannski ætti maður að nota snjóleysið til að lesa sig til um hvað séu löglegar aðferðir við göngu, hef heyrt því fleygt að það megi ekki skauta á skíðunum sem er frábært því þá er einum minna að læra. Vonandi er bara einhver náttúrulegur hrynjandi sem maður dettur í eftir fyrsta korterið í spriklgöngu. Kannski er innbyggt í Íslendinga skíðatölt sem bara kemur þegar maður byrjar að brokka og fer aðeins hraðar? Ég þarf að kanna hvort það sé löglegt. Ein leiðin til að sleppa út úr þessu með sæmd er auðvitað að láta dæma sig úr leik fyrir ólöglega skíðaaðferð!

Ég er líka búinn að reyna að finna tölfræði um slysatíðni og svoleiðis til að reyna að fá einhverja átyllu til að hætta við en það er ekki mikið um alvarleg gönguskíðaslys...helst að menn flækist saman og þurfi að kalla til vana menn til að losa. Á maður t.d. að vera með hjálm? (maður vill ekki skandala sér og mæta með hjálm ef það er ekki í hefðinni!) Síðan er það spantexbúningurinn! Spurning um að hafa hann smurðan, til að kljúfa betur vindinn (ætli það sé löglegt? kannski brottrekstrarhæft?) Ég ætti samt frekar kannski að smyrja hann með einhverju sem hægir á mér niður brekkurnar. Hefur einhver reynslu af því? Hefur einhver reynslu af einhverju sem getur komið mér að góðum notum? Er einhver þarna úti???